Бүгенге дәрестә без Х. Туфанның сәяси гаепләнеп, әдәби процесстан  көчләп читләштерелгән  чоры, ягъни тоткынлыктагы чоры иҗаты белән танышырбыз, бу чорда иҗат  ителгән шигырьләренең  үзенчәлекле якларын ачыкларбыз.                   Яралар авыр минем,                    Иңемдә - канлы кием...- дип яза  Х.Туфан бу елларда.          30 нчы елларда ил өстенә  дәһшәт килә - шәхес культы еллары  башлана.  Х. Туфан да шәхес культының бөтен дәһшәтен үз иңендә  татыган кеше. Нахакка ягылган гаеп аны 16 елга ирегеннән мәхрүм итә. Әдәби процесстан  көчләп читләштерелгән шагыйрьне  хакимият бөтенләе белән әдәбиятның  үзеннән аерырга тырыша. Исеме дәреслекләрдән сызыла, китаплары яндырыла. Төрмәләрдә иҗат эше катгый тыела. Шундый хәрәкәтләргә карамастан, ул шигырьләр язуын дәвам итә. Сакчылардан яшеренеп, юка папирос кәгазьләренә  күңелендәге уй-хисләрен терки, аларны сохари кисәкләре эченә яшереп саклый. Байтак әсәрләре юкка чыгарыла. Тоткынлыкта язган шигырьләрен ул сәяси аклангач кына матбугатка чыгара алды.