9 классыште марий литератур урок

Теме: С.Вишневскийын илыш корныжо да сылнымут пашаже.

Урокын цельже:

С.Вишневскийын илыш корныжо да сылнымут пашаже нерген шинчымашым пуаш.

С.Вишневскийын сылнымутшым келгынрак шымлаш кумыландаш.

Поэзий кумылым ылыжташ, шочмо йылме деке шÿмандаш.

Кучылтмо материал: компьютер, проектор, хрестоматий, С.Вишневскийын произведенийже-влак выставке, газет материал-влак, йоча-влакын ямдылыме презентацийышт.

Урок радам:

I. У темым тунеммаш, пенгыдемдымаш.

Йоча-влак тетрадьышке числа ден темым возат.

1 слайд. С Вишневскийын илыш корныжо да творчествыже.

2 слайд С.Вишневскийын портретше экраныште ончыкталтеш. Туныктышын каласкалымыже.

Семен Алексеевич Вишневский 1920 ий 23 майыште Волжский район, Черкесола ялеш нужна кресаньык ешеш шочын. Ачаже моткоч йорло улмыжлан кöра шуко орланен. Еш кугу лийын. Неле жапыште куд йоча гыч кокытшо гына (Йыван ден Семён) илыше кодыныт. Элексе кугыза кузе гынат, нине кок эргыжым илыш корныш шогалташ шонен пышта.