Оила инсон учун муқаддас ва улуғ бир даргоҳдир. Инсон ана шу даргоҳда улғаяди, ўсади, унади, вояга етади. Оила мамлакатнинг кичик бир мўътабар парчаси, деб қиёслаш мумкин. Бутун бир мамлакатнинг ўзига хос ишлаб чиқариш хўжалиги, иқтисодий ва сиёсий ҳаёти бўлганидек, оилада ҳам ҳаёт серқирра, оилада бу ҳаётни ташкил этиш оила бошлиғи раҳбарлигида амалга оширилади. Оила бошлиғининг ҳурмати жойида бўлиб, ўз оила аъзоларига муносиб раҳбарлик қила олсагина, оилада тартиб-интизом, меҳнат ва ором, ўзаро ҳурмат ва одоб-аҳлоқ бўлади. Қайси оилада бирдамлик, аҳиллик, тинчлик бўлса, уни маҳалла-кўй ҳурмат билан тилга олади. Бундай хонадонда ўғил-қизлар одобли, элга манзур кишилар бўлиб етишади.

Фарзанд ҳаётимизнинг мазмуни, умримизнинг давомчисидир. Ота-она, фарзанди дунёга келар экан, орзулари янада ортади, яхши ниятлар қилади. Фарзандимиз ақли-хуши, одоб ахлоқи соғлом ва бақувват бўлса, яхши ёмон кунларимизда бизга ҳамнафас, қариганда кўзимизга нур, белимизга қувват бўлса, бирор бир касб эгаси бўлиб, муҳтожлик нималигини билмай яшаса, бизни боқса, биз етиша олмаган орзуларга эришса, олийжаноб инсон бўлиб етишса, деб ният қилади.

Орзуимизни тўлалигича амалга ошиши учун биз ота-оналар ишни қачондан, нимадан бошлашимиз керак? Бу ишнинг етакчиси ким?