бұл сабақ аудандық "Жыл сынып жетекшісі - 2015" байқауына әзірленді. Сыныбы 5 сынып. Отбасы құндылықтарын, отбасын құлдырататын әрекеттер туралы балалар өз білімдерін толықтырды.

2015 жылы Қазақстанда үлкен шаралардың тізбегі тойланғалы отыр. Бұл орайда Қазақ хандығының 550 жылдығы, Шоқан Уәлихановтың 180 жылдығы, Абай Құнанбайұлының 170 жылдығы, Қазақстан халқы Ассамблеясының 20 жылдығы, ҚР Конституциясының 20 жылдығы, Ұлы Отан соғысының 70 жылдығы. Әрине, осы атаулы шаралардың қай-қайсысы да жоғары дәрежеде аталып өтері анық. Бұған әрбір қазақстандық азамат өзінің кішкене болса да үлесін қосып, құрмет білдірер. Ал, біздің отбасымыз үшін Жеңіс күні тағылымы мол, ерекше мейрам болып саналады. Себебі, менің атам Досжанов Жұбан Досжанұлы Ұлы Отан соғысына қатысып, елдің тыныштығы мен азаттығы үшін күрескен жан.

Досжанов Жұбан Досжанұлы 1921 жылы Батыс Қазақстан облысына қарасты бұрынғы Жымпиты ауданы Қызыл-Ту ауылында дүниеге келген. Атамның жастық шағы өзінің құрдастары секілді Ұлы Отан соғысының отты жылдарында, майдан шебінде өтті. Ол 1942 жылы Украинаны азат етуге қатысып,1943 жылы жараланып госпитальге түседі. Одан кейін Астрхань қаласында неміс-румын түрмесінде конвой болып, 1947 жылы ғана елге оралады. Әжеммен де сол жылдары танысып, бас қосқан. Атам 4 қыз, 3 ұл тәрбиелеп, 10 немере, 4 шөбере көріп кетті.

9 мамыр мейрамы біздің отбасы үшін , шынымен де, ерекше күн болушы еді. Атам бұл күнді тағатсыздана күтеді, ал біздің үйде үлкен дастарқан жайылады. Тума-туыс, дос-жаран, ауылдың әкімі бастаған азаматтары атамды құттықтауға жиналады. Атам келген қонақтардың барлығымен іш тарқатып, әңгіме-дүкен құрып бір жасап қалушы еді. Мейрам жақындаған сайын атамды мектепке оқушылармен кездесуге, яғни отты жылдардан есте қалған ерлік әрекеттерімен бөлісуге және аудан орталығына шақырады. Ауданымыздың барлық ардагер жандары осы аудан орталығында жиналып, ел құрметіне бөленіп, бұл кезге жете алмаған замандастарын еске алып қайтушы еді. Бұл құрмет ардагерлерге жылына бір-ақ рет көрсетілсе де, қөңілдеріне шуақ, жылулық, елге сыйлы, құрметті екендерін көрсететін күн еді.

80 жасқа жеткенше шаруаға бекем, шебер атам үшін өмірінің соңғы жылдары ауыр тиді. Біріншіден, Алла тағаланың пешенесіне жазғаны, екіншіден, өзінің төзімділігі, шыдамдылығы, үшіншіден, анамның оны өз сәбиіндей бағуы нәтижесінде атам төсекте жатқан күйінде 6 жыл өмір сүрді. Менің атам сол кезде де мойымады, сол отты жылдардың адамдарына тән қайсарлығы мен қажырлығын жоғалтпады.

Майдангер атам осыдан 3 жыл бұрын қайтыс болды. Атам соңғы демі таусылғанша ұрпағының, елінің тыныш заманда өмір сүргенін тілеген еді.

Үшінші жыл қатарынан бұл мейрамда ортамызда сүйікті атамыз жоқ. Сондықтан да Ұлы Жеңістің 70 жылдығы қарсаңында атам жайлы естелік сыр жазуым оның ерлігіне, рухына деген немерелік тағзымым болсын!

Досжанов Жұбан Досжанұлының немересі

Досжанова Аягөз Жақсыбайқызы