Резеда Вәлиева 50ләп китап авторы, 400дән артык җыр иҗат итүче танылган шагыйрә. Аның иҗаты  яшь буында телгә, туган җиргә ярату хисләре, хөрмәт тәрбияләүдә зур терәк булып тора. Бу урында тагын Фоат Галимуллин сүзләрен искә төшереп үтәсе килә: “ Ул, ягъни сез, Резеда апа, туган җиргә, табигатькә, халкыбызга, телебезгә һәм ата–анага, өлкәннәргә – гомумән, кешеләргә ихтирам, миһербанлылык һәм мәхәббәт тәрбияли”. Резеда апа нәкъ менә шул балалар дөньясын яхшы белүе, алар өчен аңлаешлы һәм гади, шаян һәм тапкыр итеп иҗат итә белүче сирәк талантларның берсе. Шуңа күрәдер, аның әсәрләре ансат укыла, аңга тиз барып җитә.