10-11 сыныфлар ичюн  къырымтатар тилинден программасы федераль компонентине, девлет стандартларынынъ орта (толу) умумий тасилине эсасланып тертип этильген.

Программанынъ структурасы  Меметов А., Алиева Л.А. муэллифлерининъ тарафындан тертип этильген «Къырымтатар тили. Фонетика. Имля. Лексикология. Фразеология. Морфология. Синтаксис. 10-11сыныф» дерсликлер структурасына уйгъун.

Къырымтатар тили къырымтатар халкъынынъ тувгъан тилидир. Тиль - бу миллий хазине ве халкъ медениетининъ инкишафында буюк роль ойнай.

Фен оларакъ къырымтатар тили бир сыра тасиль вазифелерини беджере. Лякин энъ эсас вазифеси – бу къонушув вастасыдыр. Талебелер тильни огренип, миллий медениетке къошулалар. Тильнен берабер талебелер аяттаки ахлякъий нормаларнен, дюньядаки аджайип ве чешит медениетлернен таныш олалар. Къырымтатар тили акъикъийликни огренмек вастасы оларакъ юкъары сыныф талебесине  иджадий ве интеллектуаль инкишафыны теминлей. Къырымтатар тили дигер фенлернен  де сыкъы багъда булунаракъ бильгилернинъ менимсев хусусиетине тесир эте, илериде исе керекли зенаатны сечип алувгъа ярдым эте.