Тарих фәнен укытудагы бүгенге көн таләпләре һәм мәгариф системасына БДИ (ЕГЭ) ның ныклы адымнар белән үтеп керүе күпчелек укытучыларны иҗади эзләнүләргә этәрә. Билгеле булганча, БДИның нигезен төрле формадагы тестлар тәшкил итә. Ә тестларга дөрес җавап бирер өчен фәнне камил белү генә аз, күбрәк әлеге тестлар белән эшләү күнекмәләрен кабатлау зарур. Кәгазьдә язып, аны укучыларга таратып, соңыннан җыеп алып тикшерү укытучыдан бик күп вакыт сорый. Бүгенге көн заман техникасы, ягъни компьютер һәм махсус программалар тестлар төзү һәм чишү өчен укытучы хезмәтен күпкә җиңеләйтә ала. Әлбәттә, бу очракта, компьютер белән эшли белү күнекмәсе дә кирәк.