Кеше, табигате буенча социаль зат буларак,башка кешеләр белән бәйләнешкә кермичә яши алмый.Ул үз фикерләрен,хисләрен,теләкләрен,ниятләрен башкаларга җиткерергә,алар белән киңәшергә омтыла.Шуңа күрә ул аралашырга мохтаҗ була. Төп аралашу ысулы булып сөйләм,ә иң борынгы аралашу коралы булып тел санала.

Рус балаларына татар теле өйрәтүнең төп максаты-аларны бу телдә сөйләшергә өйрәтү.Шуңа күрә, яшь үзенчәлекләрен искә алып һәм дәресне оештыруның төрле алымнарын кулланып,балаларны мөмкин кадәр активрак сөйләмгә тартырга кирәк. Коммуникатив метод телне аралашу чарасы буларак үзләштерү максатын куя.Бу максатка ирешү өчен,укучыларда коммуникатив компетенция формалаштыру бурычы куела.Коммуникатив компетенция-аралашу максаты һәм сферасыннан чыгып,үз сөйләмеңне булдыру өчен кирәк булган белем һәм күнекмәләргә ия булу дигән сүз ул.