"Описание материала:

1. Мин үземнең хезмәтемне үзем яшәгән төбәктәге музейларга багышладым. Укытучым музейлар белән кызыксынганымны белгәнгә күрә, бу эшне миңа тәкъдим итте. Мин музейлар белән кечкенәдән кызыксынам. Төрле музейларга бик теләп йөрим. Татар теле укытучыбыз безне башлангыч сыйныфларда укыганда ук Тукай- Кырлай авылында урнашкан Габдулла Тукай музеена алып барган иде. Андагы матур табигатьне, бөек шагыйребез иҗатына багышланган экспонатларны күреп мин таң калдым, сокланып карап йөрдем. Музейларга булган мәхәббәтем миндә шул экскурсия вакытында уянды да инде.

2. Мин үзем тумышым белән Татарстанның иң матур почмагында урнашкан, саф татар телендә сөйләшүче, Тукай бабабыз туган як - Әтнә ягыннан. Хәзерге вакытта мәркәзебез Казанда яшәсәм дә, һәр ял саен диярлек туган ягыма - Әтнәмә кайтам. Әтнә ягы татар әдәбиятына, мәдәниятенә бик күп күренекле шәхесләр биргән төбәк: Шиһабетдин Мәрҗани, Габдулла Тукай, Сибгат Хәким, Самат Шакир, Хәкимҗан Халиков, Лена Шагыйрьҗан, Луара Шакирҗан һ.б. Туган ягым халкы да шул шәхесләрне белеп, иҗатларын хөрмәт итеп, алар белән горурланып яши. Безнең районыбызда да, башка районнардагы кебек үк, музейлар күп. Авылга җәйге ялга кайткач та, районыбыз музейларына барырга яратам мин. Шуларның берничәсен, үзем барып күргәннәрен әйтеп китәсем килә. Күлле-Киме авылында якташыбыз, бөек язучы Сибгат Хәким музее күп еллардан бирле эшләп килә инде.

Мәрҗән авылында бик матур музей - Ш.Мәрҗәни музее бар. Күәм авылы мәктәбендә эшләп килүче музей - Самат ага Шакиров музее. Самат Шакиров халкыбызга бай әдәби мирас калдырды. Олыларга ихтирам, туган туфрак, туган нигезгә мәхәббәт тәрбияли аның музее. Бу музейларда бөек шәхесләребезнең тормышы, иҗаты чагыла. Тукаебыз туган Кушлавыч авылы да элек Әтнә районына керә иде. Кушлавычтагы музей-йорты Мөхәммәтгариф мулланың йорт-җире урынында, элеккечә итеп яңадан торгызылган хәзер. Бүлмәнең бер почмагында зур мич урнашкан, ул чын мәгънәсендә гаилә учагы җылысын биреп тора. Безнең район үзәгендә дә туган якны өйрәнүче музей”Туган як музее” эшләп килә. Музей тышкы ягы белән үк үзенә җәлеп итеп тора.Эченә килеп кереп музей белән танышуга, районыбызның үткәне һәм хәзерге тарихы белән танышырга була. Шушы музейлардан тыш, әле мин башка районнарда эшләп килүче күп төрле музейларда һәм мәркәзебез Казандагы бик күп музейларда булганым бар.

3. Музейлар - үткәнебез һәм хәзерге тормышыбызны тоташтырып торучы күпер ул. Музейлар - кешелек дөньясы, халык милләт хәтере генә түгел алар. Алар килгән кешеләрне тәрбияләү, аларга педагогик тәэсир итү чарасы да.