Әгерҗе – район буйсынуындагы шәһәр (1938), район үзәге. Иж елгасының уң кушылдыгы булган Әгерҗе инеше буенда урнашкан. Казаннан 380 км. ераклыкта Казанга, Екатеринбурга, Ижауга баручы эре тимер юл үзәге. Шәһәрнең мәйданы 8,6 кв. км. Халкы 19,6 мең (1993), шуларның 50% -татарлар, 38,3% - руслар, 7,2% - удмуртлар, 1,3% - марилар. 1646 елдан бирле билгеле. 1920 елга кадәр Вятка губернасына керә. 1920 елдан Татарстан составында, 1921-24 елларда кантон үзәге. Шәһәрдә 3 урта мәктәп, 1 гимназия, 27 һөнәр бирү училищесы, мәчет, тимер юл предприятиеләре, төзү материаллары заводы, ашлык кабул итү предприятиесе, урман хуҗалыгы, мәчетләр, чиркәү, сәламәтлекне ныгыту өчен спорт корылмалары һәм башка бик күп учреждение-предприятиеләр бар.

Әгерҗе - тимер юлчылар шәһәре. 1914 елда Үзәкне Себер – Урал белән тоташтыру максатларыннан салына. Ул шәһәрнең йөзен, тормыш- көнкүрешен бик нык үзгәртә.Тормыш бер эзгә төште дигәндә генә, Октябрь инкыйлабы давыллары бөтерелә башлый. Аның бер учагы нәкъ менә Әгерҗе төбәгенә туры килә. Биредә кызыл гаскәр белән акларның Колчак армиясе берләшә. Халык тагын бер мәртәбә “сират күпере”н кичә. Бу чор истәлеге булып шәһәрдә кызыл командир В.М.Азинга салынган һәйкәл тора.

Әгерҗе- тарихи төбәк. Ул үзенең Иж-Бубый мәдрәсәсе белән данлыклы.