Пәні: Дінтану негіздері

Сыныбы: 9 «А»

Тақырыбы: §11 Ислам діні.

Мақсаты: Әлемдік діндердің бірі – Ислам діні жайында жан-жақты мағлұмат бере отырып сыни тұрғыдан саралауға үйрету.

Міндеттері:

1)Білімділік: Оқушыларға Ислам дініне дейінгі Арабия түбегіндегі жағдай жайында, Ислам дінінің шығу тарихы және оның құндылықтары туралы түсінік қалыптастыру.

2)Дамытушылық: Жас ұрпақты жаһандану ағынынан тыс қалмауға бейімдеу, белсенді азаматтық көзқарасын қалыптастыру, БАҚ құралдары мен ғаламтор материалдарын пайдалана отырып дамыта оқыту.

3)Тәрбиелік: Оқушыларды толеранттық пен ұлтаралық ынтымақтастыққа шақыру, Отансүйгіш, рухы жоғары азамат етіп тәрбиелеу, Ислам діні атын жамылған және өзге діни секталардың ұстанымдарының бағытына түсіп кетуден сақтау.

Функционалдық сауаттылық -  Конфессияаралық бейбітшілік пен келісім көпұлтты, көптілді және көпконфессиялы Қазақстан – бүкіләлемдік діни форум орталығы. (Әлемдік және дәстүрлі діндер көшбасшыларының съездері)

Сабақтың түрі: Жаңа білім беру

Өткізу әдіс-тәсілдері: Сын тұрғысынан ойлау стратегиялары: «Ойлаудың 6 қалпағы», топтық жұмыстар, ассосация.

Сабақтың көрнекілігі: Интербелсенді тақта,дүниежүзінің саяси картасы, діни кітаптар, слайдтар, суреттер.

Пәнаралық байланыс: Тарих, адам және қоғам, әдебиет.

Сабақтың барысы:

Ұйымдастыру кезеңі:

Оқушылармен сәлемдесу, сабаққа дайындық деңгейін анықтау.

I.Қызығушылықты ояту кезеңі.

Сабақтың эпиграфымен таныстыру

«...бір ұлтқа тәндігіңді, соған жататындығыңды дәлелдегің келсе, сол ұлттың дінін әрі терең, әрі жақсы білуің керек»           

                                                                                                                                                                               М. Арын.

(Осы арқылы жаңа сабақтың тақырыбын табуға және мақсатын ашуға жағдай жасау)

                                                      Мұхаммед                                                       Араб тілі

                                                     пайғамбар

                                                            намаз                                                                    Мешіт

                                                                                                Құран

«Ислам» сөзіне ассосация жасау арқылы оқушылардың айтқан жауаптарын тақтаға жазу.

II.Жаңа мағынаны тану.

(Эдвард де Бононың «Ойлаудың 6 қалпағы» әдісі бойынша)

Балалар мен сіздерге бір аңыз айтқым келіп тұр.

Ертеде бір қария өмір сүріпті. Оның еңбек етіп жатқан өз шеберханасы, отбасы, алты баласы болыпты.

Күндердің күнінде қария дүниеден өтеді. Ал балалары оның дүние-мүлкін өзара бөлісіп алады. Тек шеберхана ішіндегі

6 түсті қалпаққа «иесі келіп, алар»,- деп тиіспейді.

Күндер өтіп жатады, бірақ 6 қалпақтың иесі келмейді. Енді алтауы алты қалпақты бөліп алады.

Арада көп жылдар өтеді. Қарияның әлгі балалары кездесіп, қалай өмір сүргендері, жеткен жетістіктеріне мақтану үшін жиналады.

Ақ қалпақты алған баласы үлкен лауазым иесі болған екен.

Қара қалпақ алған баласы өмірде ештеңеге қол жеткізбеген, өйткені өмірдің тек қара жағын ғана көреді екен.

Қызыл қалпаққа ие болған баласы ерекше сезімге берілген өнер адамы болған екен.

Сары қалпақ иесі өмірде көп жетістікке қол жеткізіп, жақсы өмір сүріп жатыр екен, өйткені қандай жағдайда болмасын тек жағымды, жақсы жағын көретін болған.

Жасыл қалпақ алған баласы шығармашылықпен жұмыс істейтін, ізденімпаз тұлға болып қалыптасқан екен.

Көк қалпақты кигені өз өмірінен сабақ алып, оны басқаға үйретіп, кез-келген үрдісті басқарып кете алатын көшбасшыға айналыпты.

Осы аңызды негізге ала отырып, сыныпты 6 топқа бөліп, алты түсті қалпақты ұсындым.

«Ақ қалпақ» иелері-жаңа мәліметтерді, оқиғаны, фактілерді айтып береді.

«Қара қалпақ» иелері-тақырып бойынша теріс, жағымсыз жақтарын бөліп қарастырады.

«Қызыл қалпақ» кигендер- материалға жекелей талдау жасап, оқиғаны сезіммен сипаттайды.

«Сары қалпақ» кигендер- тақырып бойынша барлық оң атаулыны, жағымды жақтарын іздеумен айналысады.

«Жасыл қалпақ» иелері- материалды шығармашылық формада ұсынады.(ән, қойылым, тақпақ т.б)

«Көк қалпақ» кигендер- жалпы қорытынды жасап, алған білімдерін өмірде қолдану жолдарын ұсынады.

 Мұғалім сөзі: Құрметті оқушылар! Сабақ соңында менің сіздерге тілегім: «қызыл, сары, жасыл, көк қалпақты» киіп, табыстан табысқа жете беріңіздер.

III. Ой-толғаныс.

5 минуттық эссе.

Қазіргі таңда «Ислам экстремизмі», «Ислам терроризмі» деген қауіпті қолдан жасап, Ислам дініне күйе жағылып жатыр. Олай болса, ізгілікке шақыратын Ислам дінін «діни экстремизммен» қалайша байланыстыруға болады?

(осы тақырыпта оқушылар өз ойларын жазып, түйіндейді.)

Оқушыларды бағалау.

Үй тапсырмасы.

§11 Ислам діні оқу, қосымша іздену, Ислам дінінің бүгінгі күнгі таралу деңгейі қандай? (диаграмма жасау).