نَبِيُّ اللّهِ صَالِح

Соалихь-Пайхамар Самуд нахага дын кхайкаде Дала  вайта Пайхамар хиннав. Самуд – Iарбий тукхамаех цхьа тукхам хиннад. Адам керасталах юхадетташ, Даьла  цIенача дына – Ислама – уж тIахьехаш хиннаб цо. АллахI  воацар кхы Даьла  воацалга а, Цунца мара нийсавалар доацалга а хьалхадоахаш хиннад цо. Даьла  цаI цаваьчунна, Цунца керастал даьчунна Цо лургдола Iазап а, АллахIа мутIахьа а хинна Из цаI ваьчунна хургдола дика а кхайкадеш хиннад Соалихь-Пайхамара  Самуд наха юкъе. Бакъда шоашка венача Пайхамара хьехам, Цо хьалхадоаха нийсавалар цар дIаэцаш хиннадац, Из харцвеш хиннав цар.

Самуд наха лайра шоашта Соалихь-Пайхамара, Из бакъ-Пайхамар хилар гойташ, лоамах йоаллача чхарах инкали цун кIориги араяккхар. АллахIа  низаца Соалихь-Пайхамара карагIдаьлар царна из тамашийна хIама бIаргадайтар. Адама Дала  гучадаьккхар цу тамашийна белхаца Соалихь  – Дала  вайта бакъ-Пайхамар хилар.

Дала  декхар даь тIадиллар цу наха чхарах араяьнна инкали цун кIориги цхьан дийнахьеи, хIаьта цу наьха хьайбаш цхьан дийнахьеи шо-шоай аргIах хий мела ухаргдолаш. ХIаьта уж нах царна зе де йиш йолаш а, царна юхе аха йиш йолаш а хиннабац. Иштта цхьа ха яьннай наьха хьайбаши Соалихь-Пайхамара  инкали ши-ший аргIах хий мела ухаш, цхьаккха саг цунна юхе а ца водаш.

Самуд наха юкъерча ийс саго барт баьб, Дала  даьча амрийна духьала а баьнна из инкал ювргйолаш. Из тийша болх вIашагIа беллача наха кертте лаьттар ва Къуддар бина Салиф. Цар из Iоасал кхоачаш а яьй инкал ерца. Адам цар из инкал йийна раьза хиннад. Шоай хьайбашта хIара денна хий меладар маьршаденна гIадбахаб уж, Дала  даь доазув шоаш дохадаь дале а.

Инкал ер бахьан долаш Самуд наха шеко йоацаш Даьла  Iазап доагIаргдолга дIакхайкадаьд  Соалихь-Пайхамара . Цо царна кхо ди-кхо бийса ха ялар, шоаш даьчох уж дехке а баьнна цар тоба дар догдоахаш. Бакъда наха шоай Iоасалонна Даьлехьоастабенна тоба динзар. Кераста наха барт бир Соалихь-Пайхамар  ве, аьнна. Даьла  гIонца из царех кIалхара ваьлар. 

Цул тIехьагIа Дала  царна Iазап тIатессар сигалара чIоагIа цIогIа дарца.

Цар тоба дар догдоахаш ше царна еннача ханах кхоалагIча дийнахьа Iуйрийна Соалихь-

Пайхамар , Шийца има диллача нахаца, тIавеча шоай гонашта IотIа а баха байна беррига Даьлаца  керастал мел даь нах а, цар дохадаь боахамаш а бIаргадайра царна.

Шийца Самуд нахах има дилла хинна бусалба нах а ийца Соалихь-Пайхамар  цул тIехьагIа цу мехкара Палестине дIавахар.