Бзэм изэгъэшIэн мэхьанэшхо иI. КIэлэегъаджэм бзэм изэгъэшIэнкIэ еджакIомэ аритыгъэ материалыр зэрагурыIуагъэр, агу зэрэраубытагъэр, ар ятхыгъэ, яжэрыIо псалъэ зэрэщагъэфедэшъурэр, щыкIагъэхэр, хэзыгъэхэр, блэтIупщыгъэ горэхэр фэхъугъэ-фэмыхъугъэр охътэ гъэнэфагъэ тешIэ къэси игъом ыуплъэкIузэ ышIын фае. УплъэкIун Iофыр кIэлэегъаджэм Iэпэдэлэл ышIымэ, бзэм изэгъэшIэнкIэ студентхэм, еджакIохэм аIэкIэхьэгъэ шIэныгъэхэм, ашIыгъэ гъэхъагъэхэм тэрэзэу гъунэ алъифышъущтэп, джыри нахь Iоф зыдэшIэгъэн фэе лъэныкъохэр къыхигъэщышъущтэп, студентхэм, еджакIохэм бзэм изэгъэшIэнкIэ къадэхъугъэм фэгъэхьыгъэ зэфэхьысыжьхэр ышIышъущтэп.

Студентхэм, кIэлэеджакIохэм яшIэныгъэхэр игъом ыкIи охътэ бащэ темыкIуадэу кIэлэегъаджэм зэригъэшIэнхэмкIэ щыIэ шIыкIэ-амалмэ язы шъуашэу щыт тестхэр.

Методическэ указаниехэм адыгабзэмкIэ тестхэр къадэхьагъэх. Ахэр зыфэгъэхьыгъэхэр разделхэу «Фонетикэр», «Орфографиер, орфоэпиер», «Лексикэр, фразеологиер», «ГущыIэгъэпсыныр».

Тестхэм къызэлъаубытырэ разделхэм яобъем, раздел пэпчъ къыщытыгъэ упчIэхэр, ахэмэ язэкIэлъыкIуакIэ адыгэ факультетым ифилологие отделение ыкIи гурыт еджапIэм адыгабзэмкIэ япрограммэхэм адиштэу къыхэхыгъэх.