Хәзерге заманда математик сәләте югары булган укучылар өчен төрледән - төрле специальләшкән класслар, мәктәпләр ачыла, төрле түгәрәкләр эшли . Болар барысы да укучы балаларны югары уку йортларына керергә төпле белем бирү максатыннан шәһәр җирендә укучы балалар өчен эшләнә. Ә авыл баласы нишләргә тиеш соң? Аларның да югары уку йортларына кергәннән соң шәһәр балалары белән беррәттән укыйсылары бар бит. Авыл балалары арасында да бик сәләтлеләре булырга мөмкин бит. Ләкин авыл җирендәге ата-ана баласын специальләшкән математик мәктәпкә дә бирә алмый, репититор яллап өстәмә белем дә бирдертә алмый. Авыл җирендәге сәләтле укучылар белән өстәмә эш тә һаман шул бер укытучыга кала. Укытучысы да, өстәмә белем бирүчесе дә, кирәк була калса, репититоры да шул ук укытучы булачак.