Физика фәнен белү, чыннан да, әһәмиятле. Ләкин аны кешелеккә файдалы максатларда гына куллану зарур. Кызганыч, тормышта моның тискәре мисаллары да бар. Чернобыль вакыйгасын гына да мисалга китерә алабыз. Мин үзем физика фәнен сайлавыма үкенмим. Укучыларымда да фәнгә мәхәббәт тәрбияләүне 7 нче сыйныфтан ук башлыйм(физика фәне 7 кл керә башлый). Кызыклы мәгълүматлар, тәҗрибәләр белән фәнгә алып кереп китәм. Укучыларым арасында фән олимпиадаларында призлы урын алучылар да бар. Үзем дә мәктәптә уку дәверендә республика олимпиадаларында катнашып, уңышлы чыгыш ясадым. Остазым, физика фәненә мәхәббәт уятучым дип Фаррахов Фасыйм Гыйлай улын саныйм. Укучыларым ел саен ГИА, ЕГЭ сайлыйлар, уңышлы тапшырып физика фәне буенча укуларын дәвам итәләр. Нәтиҗә ясап шуны әйтәм, Никадәр күбрәк белсәң, шулкадәр көчлерәк буласың.