Елбасымыздың «Нұрлы жол – болашаққа бастау жол» атты жолдауында «2015 жыл - ұлттық тарихымызды ұлықтау және бүгінгі биіктерімізді бағалау тұрғысынан мерейлі белестер жылы» деп атап өткен болатын. Қазақ хандығының 550 жылдығын, Қазақстан халқы Ассамблеясы мен Конституциямыздың 20 жылдығын, Ұлы Жеңістің 70 жылдығын ерекше атап өткен болатын[1, б.3].

     Жылдан жылға Ұлы Отан соғысының сұрапыл күндері алыстай түсуде. Фашистік Германия Кеңес Одағына тұтқиылдан шабуыл жасап, соғыс ашқалы жетпіс төрт жылдай уақыт өтті. Содан бері әлемде талай-талай өзгерістер болды. Бірақ, жауынгерлердің сол соғыстағы ерліктерін және фашистік басқыншыларды  ойсырата жеңген 9 Мамыр Жеңіс күнін ұрпақтары ешқашан ұмытпақ емес. Соғыс тарихына Отанын қорғаған миллиондаған адамның орасан ерлігі  мен шексіз еңбегі алтын әріптермен жазылды. Сол бір сұрапыл да ерен ерлік жылдары алыстаған сайын Отанын қорғаған батыр аталарымыздың ерліктері асқақтай түспек!