Һыҙҙырт, ҡурай, үткән ҡайғыларҙы,

Өҙҙөрт, ҡурай, йөрәккәй ҡылдарын;

Һиҙҙерт, ҡурай, ҡайнар тойғоларҙы,

Һөйҙөрт, һөйләп башҡорт моңдарын,

Һөйлә Һаҡмар, Яйыҡ, Ашҡаҙарҙы,

Һөйлә йәмле Урал буйҙарын;

Һөйлә ожмах кеүек сәхрәләрҙе,

Йәйелеп ятҡан йылҡы, ҡуйҙарын,

Һөйлә йәйләүҙәрҙә йәйҙе йәйләп,

Ҡырҙан ҡырға күсеп ҡуныуҙы;

Һөйлә ҡашмау кейеп, селтәр бәйләп,

Ҡырҙа йырлап йөрөгән һылыуҙы,

Һөйлә елберләгән таллыҡтарҙы

Шылтырап аҡҡан шишмә буйында;

Һөйлә күбәләктәр бал ҡорттарҙы

Уйнап осҡан сәскә ҡуйынында,

Һөйлә тарихыңдан, яуҙарыңдан,

Һөйлә ҡанлы башҡорт болаһын;

Һөйлә олатайҙар хәлдәренән,

Йөрөш, торош, заңын, йолаһын…