6-7 нче сыйныф укучыларының әдәбият фәне буенча белемнәрен тикшерү,балаларда Г.Тукай шигырьләренә кызыксыну уяту,иҗади сәләтләрен һәм сөйләмнәрен үстерү, үз халкың белән горурлану хисе уяту максатыннан үткәрелә. Уен тәртибе. Уенда 2 команда катнаша. Өй эшенә: визитка әзерләү, исем, девиз сайлау, командирларга татар халык мәкальләре бәйгесенә әзерләнүләр керә. Командалар исемнәренә туры китереп төрле костюмнар да әзерли ала. Залда тыныч кына күңелле татар көе яңгырый. Бүлмәгә төрле плакатлар эленә. Уенчылар үз урыннарын алалар.     Хәерле көн , исәнмесез укучылар. Кыш үтеп, яз җиткәч, халкыбызның бөек шагыйре Г.Тукайның туган көнен билгеләп үтәбез. Ел саен мәктәпләрдә сөекле шагыйребез иҗатына багышлап,  әдәби кичәләр , дәресләр уздырыла.   Г.Тукай дөньяда бары тик 27 ел яшәгән, нибары сигез генә ел иҗат иткән, шулай булса да гаять зур,бәя биреп бетермәслек рухи байлык калдырган. Аның иҗаты илебездәге төрле халыклар арасында искиткеч популяр.Тукайның язмышы һәм иҗаты халкыбыз тарихында иң  якты, иң изге сәхифәләрнең берсе.   Бүген без сезнең белән  Тукай туган көненә багышланган Тамчы – шоу бәйрәмен үткәрәбез.