Тема: Минем гаилэм

2 нче кечкенәләр төркеме өчен сөйләм үстерү дәресе. 

Максат:

1. Балаларга гаиләдә яшәүчеләрнең исемнәрен өйрәтүне дәвам итү.

2. Яңа сүзләр исәбенә сүз байлыгын арттыру.

3. Якын кешеләренә карата хөрмәт, ярату хисләрен арттыру.

Сүзлек өстендә эш: әти, әни, әби, бабай, апа, абый. Бу кем? Бу әни. Әни нинди? Матур.

Методик алымнар:

1. “Гаилә” темасына кагылган рәсемнәр карау.

2. Бармак уены.

3. “Мин әйтәм, син күрсәт”. Дидактик уен уйнау.

4. Ш. Маннурның “Яратам” шигырен уку.

Күрсәтмәлелек: “Гаилә” темасына кагылган рәсемнәр.

ДӘРЕС БАРЫШЫ:

1. Балалар, без барыбыз да гаиләдә яшибез. Әйдәгез әле рәсемгә карыйк.

Бу кем? – Әни. – Әни нинди? – Матур.

– Бу кем ? – Әти. – Әти нинди? – Зур, әйбәт.

– Бу кем? – Әби. – Әби нинди? – Бик яхшы.

– Бу кем? – Минем абыем. – Ул нинди? – Ул да бик яхшы.

– Бу кем? – Бу сеңлем. – Ул нинди? – Кечкенә.

– Бу безнең нәрсә? – (Бергәләп) Бу – безнең гаилә.

2. Балалар, безгә кунакка әби килгән (Тәрбияче кулында курчак- әби). – Ул безнең белән уен уйнар.

Әби: Яшәгәннәр ди куллар, алар бармакларга исемнәр куярга уйлаганнар. Әйдәгез, балалар, аларга булышыйк әле. (Бармакларны бөгәбез). Бу бармак – бабай, бу бармак – әби, бу бармак – әти, бу бармак – әни, бу бармак – мин. Булдырдыгыз, балалар. (Әби чыгып китә)

3. Балалар, ә хәзер уен уйнап алыйк әле. Мин рәсемнән күрсәтәм, ә сез табыгыз.

– Бу кем? (Әби, бабай, әти, әни, әби, бабай, абый, апа, энем, сеңлем) (Балалар чыгып күрсәтәләр). Бу безнең нәрсә? – Гаилә.

4. Физкультминут:

Күрсәт әле үскәнем,

Ничек яфрак коела?

Менә шулай, менә шулай,

Шулай яфрак коела. (Куллар б- н күрсәтәләр)

Күрсәт әле, үскәнем,

Ничек җилләр исәләр?

Менә шулай, менә шулай

Шулай җилләр исәләр. (Баш очында куллар б- н болгыйлар)

Күрсәт әле, үскәнем,

Ничек карлар явалар?

Менә шулай, менә шулай

Шулай карлар явалар. (Куллары б- н җилпеп чүгәлиләр)

5. Балалар, рәсемгә карыйк әле, әти нишли? – Гәзит укый.

– Әни нишли? – Бәлеш чыгара.

– Абый нишли? – Ашый.

– Әби нишли. Бәбине йоклата.

6. Хәзер, балалар, мин сезгә шигырь укыйм.

Яратам мин өемне,

Әти белән әнине,

Абый белән энемне,

Бишектәге сеңлемне.

7. Балалар, без бүген нәрсә турында сөйләштек? – Гаилә турында.

Сез гаиләгезне, әти-әнине, әби-бабайны, абыегызны, апагызны, энегезне, сеңлегезне яратасызмы? Гаиләбезне яратырга кирәк, шулай бит. Сез бүген күп нәрсәләр белдегез, булдырдыгыз, балалар, яхшы җавап бирдегез.