Дәреснең тибы. Яңа материалны өйрәтү.

 Планлаштырылган нәтиҗә: Һәр кеше үзе башкарган гамәлләре өчен үзе җавап    бирергә тиешлекне аңлату. Кеше кайда гына булса да,  үзен әдәпле, тәрбияле, культуралы тотарга тиеш икәнен төшендерү

  Дәреснең максатлары: 1. Белем бирү максаты – Хәкимҗан Халиковның, Әминә Бикчәнтәеваның бер үк сюжетка корылган әсәрләрен эчтәлеге, төзелеше һәм әйтелгән моральнең төп мәгънәсе буенча чагыштырып өйрәнү; аермалы һәм охшаш якларны ачыклау;

2. Фикер сәләтен үстерү максаты – хикәя  жанры белән танышуны дәвам итү;

 3. Тәрбияви максат – балаларда кешеләргә карата игътибарлылык, ягымлылык сыйфатлары тәрбияләү;әдәп-әхлак сыйфатларын сеңдерү, башкарган гамәлләрең  өчен җавап бирә белергә күнектерү.

Җиһазлау: компьютер, проектор, экран, тема буенча презентация, китап стенды, дәреслек

Материал. Хәкимҗан Халиковның “Хәерле иртә”шигыре, Әминә Бикчәнтәеваның “Өстәл янында»хикәясе

Дәреснең төзелеше:

1.Оештыру өлеше.

2.Терәк белемнәрне хәтердә яңарту.

3.Яңа теманы аңлату.

4.Белемнәрне билгеле бер системага салу, гомумиләштерү.

5.Йомгаклау.

                Дәреснең темасы программада “Әдәп башы-матур гадәт” бүлегенә кертелгән. Теманы  өйрәнүгә 10 сәгать бирелгән. Шул дәресләр системасында әлеге тема икенче   дәрес итеп өйрәнелә.

Дәреснең тибы аның эчтәлегенә туры килә: укучыларны кызыксындыру, актуальләштерү, яңа теманы өйрәтү, алынган белемнәрне ныгыту, камилләштерү, дәреснең дидактик максатыннан караганда, бик отышлы.

Мин дәресемне ФГОС таләпләренә туры китереп, предмет һәм метапредмет буенча, шәхси үсеш-үзгәрешләргә этәрә торган максатлар куйдым.

Структураларны үткән материалны ныгыту, анализлый белү, фикерләүләрен үстерү; яңа материалны ныгыту һәм кире информация алу максатларыннан кулландым.